Архітэктурна-планіровачная структура вёскі
Сёння Цырын — цэнтр сельсавета і КСУП "Цырын-Агра", з'яўляецца аграгарадком, які размешчаны ў 25 км ад раённага цэнтра ва ўсходнім напрамку. Праз населены пункт праходзіць дарога з аўтобуснымі зносінамі: Баранавічы — Карэлічы, Баранавічы - Дорагава, Баранавічы - Варонча. Пракладзены газа - і водаправод.
Агульная працягласць вуліц 7,25 км, у тым ліку з асфальтным пакрыццём — 6,15 км.
Архітэктурна-планіровачную структуру вёскі вызначае галоўная вуліца (участак аўтадарогі Карэлічы—Гарадзішча).
На галоўнай вуліцы размешчаны будынкі магазінаў, сталовай.
У цэнтры Цырына знаходзіцца помнік на брацкіх могілках савецкіх воінаў і партызан, якія загінулі ў Вялікай Айчыннай вайне, капліца. Да галоўнай вуліцы прымыкае сквер.
У паўночна-заходняй частцы вёскі на ўзгорку сфарміраваны адміністрацыйна-грамадскі цэнтр — двухпавярховы адміністрацыйны будынак праўлення КСУП "Цырын-Агра", зблакіраваны з будынкам сельскага Савета і музея баявой і працоўнай славы.
У гэтым будынку размешчаны : сельская бібліятэка, комплексна- прыёмны пункт, ашчадная каса, аддзяленне паштовай сувязі, аўтаматычная тэлефонная станцыя.
Музычная школа зблакіравана з будынкам сярэдняй школы-сада.
У асобным прыгожым будынку размешчана амбулаторыя ўрача агульнай практыкі.
У адноўленым памяшканні знаходзіцца цэнтральны Дом культуры. Пераважае аднапавярховая індывідуальная забудова сядзібнага тыпу. Ёсць васьмі - і дваццаціаднакватэрныя жылыя дамы, двухкватэрныя катэджы.
Зона адпачынку — рака Сэрвач.
Герб і сцяг аг. Цырын
У цяперашні час гісторыка-культурная спадчына Цырына знайшла сваё адлюстраванне і ў сучаснай афіцыйнай геральдычнай сімволіцы — гербе і сцягу. Рашэннем Геральдычнага савета пры Прэзідэнце Рэспублікі Беларусь устаноўлены герб і сцяг населенага пункта. Дарэчы, гэта адзіны населены пункт Карэліччыны, які ў мінулым атрымаў магдэбургскае права, і яго герб з'яўляецца сёння гістарычна-склаўшымся сімвалам.
Сцяг і герб вёскі Цырын з'яўляюцца яе афіцыйнымі геральдычнымі сімваламі і ўласнасцю аднайменнага сельсавета, правам распараджэння якой валодае сельвыканкам.
Сцяг і выява герба вёскі размяшчаюцца на будынках, у якіх знаходзяцца органы мясцовага кіравання сельсавета, а таксама ў памяшканнях, дзе праходзяць пасяджэнні гэтых органаў, службовых кабінетах іх кіраўнікоў.
Сцяг і выява герба вёскі могуць выкарыстоўвацца таксама ў час дзяржаўных свят, урачыстых мерапрыемстваў, якія праводзяцца дзяржаўнымі органамі і іншымі арганізацыямі, народных, працоўных, сямейных свят і мерапрыемстваў, прысвечаных памятным датам.
Сцяг вёскі ўяўляе сабой прамавугольнае палотнішча блакітнага колеру з суадносінамі бакоў 1:2, у ніжняй частцы якога на баку размешчана гарызантальная паласа жоўтага колеру, якая складае 1/5 яго шырыні. У цэнтры на паласе — выява аленя натуральнага колеру, паміж рагамі якога размешчаны жоўты крыж.
Герб вёскі ўяўляе сабой барочны шчыт, у блакітным полі якога — выява аленя натуральнага колеру, паміж рагамі якога размешчаны залаты крыж.
У 2019 годзе споўнілася 587 год з дня заснавання вёскі.
Храм Святога Архангела Міхаіла ў аг. Цырын
Праваслаўнай славутасцю аграгарадка з'яўляецца храм Святога Архангела Міхаіла, які ўяўляе сабой драўляны будынак, абкладзены цэглай. Пабудаваны храм у1989 годзе ў выглядзе крыжа на месцы старой царквы. Вырашана працяглым прамавугольным у плане аб'ёмам, які пераходзіць у 5-гранную апсіду, над якой, як і над фасадам, завершаны цыбулепадобнымі купаламі на 8-гранных барабанах. Сцены члянёны прамавугольнымі аконнымі праёмамі і лапаткамі ў прасценках. Гістарычным папярэднікам сучаснага храма з'яўляецца драўляная праваслаўная царква, якая была ўзведзена ў 1852 годзе. Праз дзесяць гадоў пры ёй была адкрыта царкоўна-прыходская школа. Аднак у гады Вялікай Айчыннай вайны Царква ў Цырыне была спалена.
У цэнтры аг. Цырын пабудавана прыдарожная капліца.
